Archive for February, 2010

HIV/AIDS!!

Posted in Personal on 02/17/2010 by ramtea

Kum 2006 kum tawp a lo thlen meuh chuan kum 3 chhunga kan lo beih ve tang tang rah chhuah chu kan hre ve ta. Vanneihthlak takin, Pathian zarah hlawhtling takin ka zirlai chu ka zo ve ta hlawl mai. Kum 2007 kum a lo her chhuak a, zirna sang zawk beih leh ka rilruk avangin coaching class kal turin ka thiante nen Guwahati lam kan pan ta a.

Guwahati kan thlen chuan awmna tur ngaihtuahin Private Hostel kan zawng a. Hostel tha pangngai tak mai, man to lutuk silo chu kan hmu ta a. Mahse kha hostel a admission ti tur khan Medical Test neih a ngai a. Heng Blood Group, Rh Factor, VDRL leh HIV test neih a, a report kha submit tur a ni. Tichuan kan thianho chuan thisen test tur chuan kan kal ta a. Private hospital 1 ah kan kal a, kan thisen kan lak tir zawh chuan tlailam a a result lam tura min hrilh hnuah Hospital chu kan chhuahsan ta a.

Nilenga kan tihtur tul kan tih hnuah chuan kan thisen test result lam turin hospital chu kan pan ta a. Kan lehkha te an endik hnuah kan thisen test result chu envelope in min pe chhuak ta a. Kan thianpa 1 tuna misual[dot]com admin zinga mi 1 hian ka result chu ka en hma in min chhuhsak nghal a, an test result kan en a, an result ah chun “No Reactive” tih hi a lo chuang kalh mai a. Ka result kan han en ve ta chu ka rin a lo ang ta lo tawp mai!! Kan thianpa The chhamanator (misual) a hian envelope chu a hawng a min han hmuh mai chu!! Sawi leh tur hi a awm tawh lo reng reng. Ngaihtuah a tawi tak mai a ni.

An test result kan en khan an resultah khan tihian a inziak a:

VDRL                                                                           No Reactive

HIV                                                                              No Reactive

Tiin a indawt hian a inziak a. Ka result kan han hawng ve mai chuh!!! A tlar hnihna zawnah hian “Positive” tih hi a lo chuang kulh mai chu niin!! Hmuh rual rualin ka thaw a tawp chawt ni hianka hria. Ka awmdan chiah pawh kha ka hrethiam tawh lo. Chuta karah chhama pek chuan min la sawi thaih leh nghal. [L].

Second reilote hun chuan ka lehkha chu min pe a. Kan enchian chiah kha chuan ka lawmdan leh Chhama ka ngei dan kha a intluk thual ta ve ang. Ka resultah chuan ti hian a lo inziak a:

BLOOD GROUP                                                             O

RH Factor                                                                       Positive

VDRL No                                                                          Reactive

HIV No                                                                             Reactive

An resultah khan a tlar 2-na ah khan HIV result kha an ziak bawk si kha min tih mangan a tum ve reng a niang chu, a veilam hliah siin a dinglam tlar 2-na chiah hi min lo hmuh kha a lo nia. Reilo te chu HIV +ve emaw ka nih ka inti hman a nih chu.

Tunhnu a ka ngaihtuah let leh hian HIV +ve damlote hi an lo va khawngaih thlak tak em! Kei pawh second reilo te chhung pawhin khati khawp khan min thawng a nia. Anni damchhunga he natna hrik an vei tawh tur hi chu ka lainat in an rilru zawng zawng hriatthiam pui lo mah ila an taksa tawrhna bak an rilru hrehawm tur zia hi chu ka tem ve zawk tawh in ka inhria.

I puitlin hunah enge nih i tum?

Posted in Personal on 02/09/2010 by ramtea

Ka naupan lai Primary school kan kal laiin ka pa in “I puitlin hunah enge nih i tum”? tiin min zawt a. Kei chuan ka puitlin hunah chuan Driver nih ka chak thuin ka chhang a!! A ni lah taka, kei anga lirthei lawm tan kha chuan a chak awm bawk a ni. Truck driver nih a, vairam atanga thil rit tak han phurh haw a, muangchang a han tlan a thiante nena han inzui kha nuam dawn riau hian ka hre thin!!

Khatih hunlai kan nun mawlmang tak kha tuna ka ngaihtuah leh hian ka ngai thin ngawt mai. Keini thingtlang mi, khawpui nunphung hre phalo tan kha chuan rualawh nachang pawh kha kan hre meuh lo. Nitin school kan kal a, kan school kalkawngah BRTF camp kan kal tlang a, motor an lo siam tum kha chuan school tlai khawpin ka en thin kha a ni a.

Hun alo kal zel a, High School kan han kal kha chuan tum pawh a lo dang ta deuh a, zirtirtuten enge nih I tum tia min zawh kha chuan thiante sawi vang nge tum mumal nei vaklo pawh khan Doctor, Zirtirtu, IAS etc.. tih vel kha kan chhanna kha a ni thin. Engti tihin emaw Pawl 12 kan han zo ve a. Aizawl lamah College kal turin kan han chhuak ve hlawl a, boruak a lo danglam ta, kan zirlai puite leh thiante kha chu lehkha thiam tak tak an lo ni a, sap tawng a tawng zat zat theite an lo ni nawlh hlawm ta mai.Keini thingtlang a kan school kal laite kha chuan kan zirtirtuten, “School ah sap tawng hman tur, in hman tam chuan in tan a tangkai dawn a ni” an tih rual rualin kan bula thu kan thiante nitina kan kawm thinte kha fiamthuin “What is your name?” kan han ti zui a. Hmasawn ngaihna kha a awmlo hrim hrim.

College chu kan han kal ve a, kum thum hnuah chuan kan han graduate ve ngei a. Ka naupan laia ka nih tum kha ka hre reng a, mahse nih tum chuan ka bei ta hran lova. Hun alo inher a, sawrkar hna kan duh ve a, Graduate nih ringawt kha chuan hna a vang bawk si, chutah Post Graduate tal tiin zirna chhunzawm leh turin vairamah kan fehchhuak ve rawih a. Eng tak ang zel ang i maw?

Mihring mi pangngai a piangchhuak te hi chuan kan damchhung hian nih tum kan nei theuh in a rinawm, kan dinhmun leh khawsakna a zirin kan nih tum pawh a inanglo thei viau dawn a lo ni, tih min ngaihtuah chhuah tir a. Naupan laia nih tum ti hlawhtling hi engzat tak awm ang maw?? Nang enge i naupan laiin nih i tum ve le??

Barabba nge, Isua, Krista an tiha chu?

Posted in Gospel on 02/06/2010 by ramtea

Mathaia 27:17

Chutichuan an rawn inkhawm chuanin Pilatan an hnenah, “Tunge chhuahsak che u ila in duh? Barabba nge, Isua, Krista an tiha chu?” a ti a.

He Bible chang hi kan hre theuh awm e, chang lar tak, Lal Isua Krista an man a, Pilata hnena an hruai a, Pilatan Isua chungchang ro a rel sak a mipui ngaihdan a lakna a ni.

He zawhna hi zawhna pawimawh tak chhan awlsam tak anga lang mahse kan chhanna anga kan nunpui theih thin loh a ni. Lal Isua an man lai khan he zawhna dawngtu leh chhangtu te kha hlawm 4-ah a then theih a, an chhanna pawh a inang tlang hle in a lang.

He zawhna “Barabba nge, Isua, Krista an tiha chu?” tih dawngtu leh chhang hmasa bertu chu Juda Iskariota, Isua zirtirte zinga mi kha a ni. Lal Isua zuitu leh a rawngbawl saktu, a hnena awm a, a thiltih mak tamtak hmutu a ni. Mahse he zawhna a dawn khan a chhanna chu “Amah chu ka mantir ang che u a, engnge min pek ang?” tiin a zui thin Isua Krista chu a phatsan ta a ni tih kan hria.

Petera khan he zawhna hi a chhang ve leh a, Lal Isua Olive tlanga a hruai khan An zain i chung thuah lungni lovin awm mah sela kei zawng lungni lovin ka awm tawp lo vang,” (Mat 26:33) tih leh “I thihnaah chuan thi ve dawn mah ila ka phat tawp lo vang,” (Mat 26:35) tiin a tawngka in chang mahse Lal Isua an man zanaah kha chuan Petera meuh pawhin vawi thum lai mai Lal Isua a phatsan a ni tih kan hmu a ni.

He zawhna chhangtu dang leh chu Pilata a ni. Pilata hi he zawhna zawttu angin lang mahse a rorelna atangin he zawhna hi a chhang a. Mathaia 27:15 ah heti hian kan hmu a, “Tin, Ram Awptuin kut niah chuan mi tang pakhat, an duh apiang, mipuite chu a chhuahsak thin a.” tiin. Hetah hian mipuite duhthlan Baraba chu a chhuahsak ta a, Lal Isua chu “in tih tihin ti rawh u” tiin a pe ta a ni. Pilata hian Lal Isua sualna a hmu lo, mahse mipuiho avangin Lal Isua aiin Baraba a chhuah ta zawk a ni tih kan hria. Pilata hian Lal Isua felna en lova mipuiho duhdana a kal avangin duhthlanna a hmangsual ta a ni. Kan nitin nunah pawh Lal Isua en lova Khawvel thil, a nawmna te, a duhawmna te, midang ngaihdante kan en thin avangin Pilata ang main thlan tur diklo kan thlang thin a ni.

Chhangtu palina chu Juda mipuite Lal Isua Rorelna a lo pungkhawm ho kha an ni. Anni chuan krawsah khengbet rawh tiin an chhang a. Chumai piah lamah “A thisen chu keimahni chungah leh kan fate chungah awm rawh se,” tiin an chhang a ni.

Heng kan sawi tak te zawng zawng hian an zawhna dawn hi an chhang sual vek a ni. Juda Iskariota chu a chhang sual a ni tih a hriat meuh chuan a tlai tawh a, a inchir a, mahse a tlai lutuk tawh. Amah leh amah a intihlum a ni tih kan hmu. Petera hian a chhan dikloh avangin a inchhir a, a tap zawih zawih ani tih kan hmu bawk a. A hun lokal zelah Lal Isua tana mi tangkai tak a ni tih kan hmu thei a ni. Pilata chuan thiam inchantirnan mipuiho hmaah a kut a sil a ni. Mahse Juda ho ngaihdanah chuan “Enganga tam pawhin a kut sil mahse Lal Isua thisen kai kha chu a silfai thei chuanglo” tih hi a ni. Juda mipuite hian Lal Isua an hnawl avangin chumi rahchhuah chu vawiin thlengin an tuar a, Israel ram chu rambuai a ni kumhlun ringawt mai a ni.

Awle he zawhna hi tunah keini pawh zawhin kan awm mek a ni. “Barabba nge, Isua, Krista an tiha chu?” entin nge kan chhan ve dawn le? Tawngka a chhan ngai a ni lova kan nuna kan chhan tur zawhna a ni. Thlan tur dik chu kan hria. Chumi thlangtu te chu mi vannei berte an ni. Thlan tur diklo kan thlang a nih chuan kan tawpna chu Juda Iskariota anga duhawmlo kha a ni thei.

Kan nitin nunah harsatna leh thlemna tam tak karah pawh Lal Isua thlangtu kan nih theuh theihnan Lalpan Malsawm Rawh Se. Amen.

Ka blog hmasa ber atan.

Posted in Uncategorized on 02/06/2010 by ramtea

Thian ten hun rei tak atanga an lo buaipui tawh leh thu tamtak an post tawh laiin hei bul ka tan ve dawn chauh chu a ni a, engtak ang ang i maw.

Thu leh hla thiamlo leh ngah lo mi keini ang hian eng tak han ziak ve ang maw?? Theih ang angin update ve zel chu tum phawt mai teh ang…