Information Technology in Kohhran a nghawng tha leh thalo a neih dan

Kan thupui kan sawi tan hma in kan chian theih nan ‘Information Technology’ tih hi han sawifiah hmasa ila. ‘Information technology’ kan tih chuan tunlai hmanraw changkang; Computer leh a kaihhnawih, Internet te, Mobile phone te, Cable TV te leh Radio te hi a huam thei awm e. Heng kan sawi tak thilte hian kohhranah a hranpa in nghawng a nei dawn em ni? Tih ngaihdan a awm mai thei . Mahse keini a hmangtu, ringtu inti te hian kan hmandan a zirin Indirect-in kohhranah nghawng a nei tih kan hriat a pawimawh awm e.

Tunlai hmasawnna Information Technology hi a hmangthiam tan chuan tangkai tak leh hmasawnna nasa tak thlentu, a hmangthiamlo tan erawh chuan chhiatna thlentu; ruihhlo hlauhawm tak ang maia mihring nun tichhe vek thei a ni. Chuvang chuan thiam tak leh fimkhur taka kan hmana kan inzirtir hi a pawimawh hle a ni. Mi tamtakin an lo dinchhuahpui tawh a, an dinchhuah pui mek zel lai hian mi thenkhat chu chhiatpui hlen ta te pawh an awm a ni.

He Information Technology hi Mizoramah kan hmelhriatna ala reiloh ngaihtuah chuan kan nunah nasa takin a bet ta a ni a tih theih awm e. Mi tamtakin rawngbawlna pawimawh takah an hmang chho mek a.Internet kaltlang te, TV kaltlang te in mi tamtakin rawngbawlna zau zawk an neih theih phah a, thlarau bo zawn nan hmanraw tangkai takah an hmang mek a ni. Internet lamah kan Synod ngei pawhin website te neiin rawmpawn a awm te tan pawh thil tangkai tak niin a lang. Chu mai bakah ramchhung leh rampawn ah mi tamtakin an mahni pualin website-te neiin Pathian thu te ziakin khawvel hmun tina mite chhiar theih turin an pholang a, Hnamdang tawng thiamte tan phei chuan Pathian thu zirna tha tak leh tangkai tak, mahni nun chawmtu atana hman theih a lo ni reng mai. Tin, Internet kaltlang hian chanchin a inhrilh zung zung theih a, khawvel hmun khawilai ah pawh thil thleng kha awm hmuna thilthleng ang maiin kan lo hre thei ta a ni. Chung chuan ringtute rawngbawlna kawngah thawhhona tha tak a siam a ni.

He website rawngbawlna mai piah lamah tunlai thalai zinga lar em em, Social Networking Site (SNS) an tih mai ‘Facebook’te, ‘Twitter’ te, ‘Orkut’ te leh website dang dang te hi Pathian rawngbawl nan tangkai takin a lo hman theih reng mai! Mi tamtakin Pathian thu sawihona tur Group te siamin Pathian thu an sawiho thin a, thlarau nun chawmna leh intihchak tawnna tha tak atan an hmang mek a ni. Heng kan sawi tak. Social Networking Site te phei hi chu khawvel pumah thalai 80% vel hian an hmang niin chhut a ni, chuti a nih chuan kal chhuak kher theilo tan pawh mite tan Missionary hna awmhmun atangin kan thawk thei tihna a ni.

Tin tunlaia mi kan hmanlar em em : Mobile Phone te hi rawngbawlnan tangkai takah a hman theih bawk a. Chawp leh chilh a committee han koh mai nan te, thu pawimawh han inhrilh hriat zung zung nan te leh thil hrang hrangah kan hmang tangkai ta hle. Tin,mi thenkhat phei chuan mobile phone hmang hian Pathian thu hmangin councelling te an inpe mek zel bawk a ni. Tin, tunlai media zinga lar ber, mi zawng zawng thlengphak tih theih hial chu TV leh Radio te hi an ni. Heng hmanga rawngbawlna phei hi chu a thleng zauvin a huamzau hle a. Mi thahnemngaite avangin kan ramah ngei pawh IMEM channel te kan lo nei ta. Hengte hi tunlai Information Technology hmasawnna vang a ni kan ti lo thei lovang. Heng rawngbawlna te hi mi tamtak biak In rawngbawlna chhim pha tawhlo te hnena rawng kan bawl theihna tangkai tak, an hnena Pathian thu kan hrilh theihna tangkai a va ni tehlul em!

Information Technology hmang hian Khawvel ram hrang hrang ringtute kan inlaichin phah a, tawngtaipui ngaite kan in hretawnin kan chaklohna ah te kan indawmtawn a, nasa takin kan intanpui tawn mek zel a ni.

Chutihrual a kan ngaihthah miah loh tur chu khang kan sawi tak Information Technology; thil tha tak ni a lang, a hmangthiamlote  leh hman khawlohna avanga ringtute nuna nghawng thalo a neih theihte hi a ni.

Kan sawi tawh angin Information Technology hi hman dik loh chuan ruihhlo hlauhawm tak ang mai a ngawlvei theih, damchhung nun tichhe theitu a ni. Tunhma atanga kan hriat thin, kan Zoramah ngei pawh mi thenkhatin mi thlalak dukdaklo pui puia sawisain midangte dawtin an timualpho tawh thin a. An thiamna te a diklo zawnga hmangin midang tih mualpho nan an hmang tawh thin a ni.

Internet-te hi a hmang tangkai duh tan chuan tangkai tak ni mahse tunlai thalai; ringtu tamtak tena kan chhiatpui nasat ber a ni awm e. Kan Zoramah ngei pawh thalai tamtak Internet ringawt atchilh; thil tha leh tangkai tih nana hmanglo thil thalo tih nan ringawt a hmang leh buaipui kan pung chho mek zel ani. Tunlai tawng takin “Internet ah hi chuan awmlo pawh a awm vek” tih khawpa thil awm chikim a ni a. A duh tan chuan engkim a tih theih ti ila kan sawi sual tam awm love. Thalai zingah inkhawm hlana Internet a thiante nena inbiak mai duh zawk kan pung chho zel. Internet chu an pathian emaw tih mai turin an nunah a bet tlat a. Kan sawi tak ‘Facebook’ emaw tello chuan awm theilo tlata inhriatna an nei lian tawh hle a ni. Thilthalo tih nana hmangin milem leh video thalo leh duk daklo pui pui en nan leh lakkhawmna tha ber a lo ni a. Zan rei tak tak men puiin zing thawh nachang an hrelo a, chung an thiltihte chuan an rinna tichhiain nun beidawnna ruamah a hnuklut thin a ni.

Information Technology hmasawnna lama a hmanraw bulpui ber Computer hi a hmanna a tamin tih theih pawh a ngah hle. Chung zinga kan tuipui em em chu ‘Computer Games’ hi a ni awm e. Mi tamtak in eizawn nan Games te siamin chu chu thalai ten lo tuipui in zan mut thulh thak thakin kan khel ta mai thin hi chu inennawn kan ngai  hle a ni. Mitthi lumenna a zan khat pawh tlaivar hlei theilo kha Computer Games khel chuan zan tam a zawnin a tlaivar leh thei si! Ringtute tih atan a mawi em le? Tin, Computer Games kan sawia kan sawi hmaih miah loh tur chu kan games khelhin kan nuna nghawng a neih hi a ni. Tunlai mi tamtakin an tuipui em em games chu ‘Grant Theft Auto’ hi a ni. A game-ah chuan mi awm mai mai lai silai a kapin emaw kutthlakin emaw an tihlum a, an pawisa leh thilneih te an laksak thin a ni. Khawvel ram changkang zawk tena an zirchianna ah chuan hetiang game khel nasa te hian tharum thawh an pawisa lo a ni tih an hmuchhuak a. Hmun tamtak a tharum thawhna lo thleng tawh an zirchianna ah hetianga tharum thawhtu te hi hetiang tharum thawhna game khel nasa an ni tih an hmuchhuak bawk. Heng game te hi ringtu te tan a him em le?

Game reng reng hi a siamtu company te hian a khel thei chin kum bituk (rating) an nei zel a, keini ramah chuan kan tu leh fate lawmzawng a nih chuan engmah kan ngaihtuah lemlo niin a lang. Nu leh pate pawh hian kan faten eng nge computer-ah an tih thin tih kan hriatpui hlawm em? Heng kawngah te hian kan fimkhur a va tul tak em! Kan sawi tak ‘Grant Theft Auto’ kan tih te phei hi chu ram thenkhatah chuan an rama khelh leh lakluh an khap hial a. Keini ramah hian hetiang dan neih te hi a hun ve tawh kan ti em?

Television chungchangah pawh hian ngaihtuah tur a tam hle awm e. Kan en duhzawng leh kan tuipui zawngte hi engte nge? USA a zirchiannna an neihah chuan TV a film lo chhuak thin leh fakna kan tih ang chi ah hian ni khatah (darkar 24 chhungin) tharum thawhna minute 5 dan zelah a lang niin an sawi. Chutiang tharum thawhna kan hmuh hnem lutuk chuan kan rilru kawng diklo ah a hruai peng a ni tih an hmuchhuak a ni. TV-a hnamdang ho incheina lepchiah tak an nunphung tak tak ni lemlo te a tak tak emaw tiin kan lo zir chhawng ve a, an tawngkam leh chetzia diklo leh thalo tak tak te a awmzia leh nihna hre tak tak si lovin kan lo zir ve thin hi chu ringtute kan inenfiah a ngai niin a lang. Ze nghet neia, rinna kawnga nghet taka ding tur kan nih zia kan hriat nawn a pawimawh hle in a lang.

Awle, kan han sawitak tlemte atang hian ‘Information Technology’ chu rawngbawlna atan tangkai takin a hman theih a, chutih rual chuan diklo takin a hman theih a ni tih kan hre thei awm e. Keini ringtute hian khawvel changkannna ina a ken tel; Information Technology hi engtin nge kan hman ve dawn le?

(He article hi Presbyterian Kohhran Saitual Chhimveng in Literature week 2011 kan hmanna  article inziah siak ah lawmman 2 na ka lak pui)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: