Archive for Pathian thu

Ka Lova Hrethiam Har Em!!!

Posted in Gospel, Ho mai mai, Personal with tags , on 01/10/2012 by ramtea

Khawi nge, kan inpuang mualpho ta sa sa. Han inpuan belh leh law law teh ang. Eng ka ti nge mawni kei hi Lungleng tur reng renga Khuanu ruat ka ni bik emaw ni? Lunglen avanga tah te hi ka sam bik riau ni hian ka hre thin.

Ka hun kaltawh ka ngaihtuah let a; ka chhuikir hian eng hun hi nge ka hlim ber tum ni ang aw tiin ka ngaihtuah let mai mai thin. Ka hriattheih chinah ka hlim ber tum nia ka ngaih chu; ka post hmasa lama ka sawi tawh tho; ka bialnu; kum 2 dawn ka lo vei ve tawh, vawi tam tak ka duh thu pawh ka lo hrilh tawh, beidawn tawh lama an rem ta kha chu!! ka hlimzia kha ka sawifiah thiamlo a ni!! Khami tum ang reng renga ka hlimna in a tawnsan kha ka la hrelo a ni.

He thu ka ngaihtuah ruala ka rilru a thu lo lang chu, Pathian hmangaihna hi a ni. Pathianin min hmangaih em em a, A hnen kan pan theih nan kawng min hawn sak a, keini chuan sual lam kan hawi lui tlat a, chuti chung chuan beidawng lovin min la nghak tang tang zel zawk a nih hi. A hnen pan turin min sawm reng chung pawhin kan la hawisan lui tlat hi chu Pathian rilru hi a na ngawih ngawih hian ka ring thin.

Heti khawpa min hmangaihtu kan nei hi kan va phulo tak em!! Kan phu vanga leh kan fel vang liau liaua he hmangaihna hi dawng tur ni ta ila chuan tumah hi dawng thei kan awm dawnlo tih hi a chiang reng a ni. Mahse kan Pathian chuan he phuloh hmangaihna hian min la umzui reng a, a hnen pan turin min la sawm reng a ni si.

Mihring hmangaihna leh Pathian hmangaihna chu tehkhin rual nilo mahse heti hian ka ngaihtuah a. Keini mihring mahin kan hmangaih ngawih ngawihten min duh loh chuan kan rilru a na in hrehawm kan ti a, min lo duh ve hlauh chuan kan hlim thinzia te ka ngaihtuah hian mihring hmangaihna aia nasa zawk hmangaihna neitu Pathian hian amah kan hawisan tlat hian eng ang takin rilru na ang maw?? Chutih rual chuan a hnen kan pan hian kan Pathian hlimna hi a va nasa dawn em!!

Advertisements